Жомокко саякат (2-бөлүм)

Шумдуктар дүйнөсү

Сентоза…Учурдун легендасы, жомогу… Заманбап, кооз, коопсуз, бейпил,тынч, шаңдуу, көңүлдүү, сырдуу, таң калычтуу, шумдуктуу…Эч кимди кайдыгер калтырбай турган сыйкырдуу арал. Унутулгус көз ирмемдердин, кайтлангыс таасирлердин, чеги жок эргүүнүн мекени. Сентоза – “Сингапурдун жүрөгү”.

Сентозага автобус, такси, метро, анан да асмандагы аркан жолдор менен барсаңыз болот. Мен булардын ичинен эң кызыктуусу аркан жолдорду сунуш кылыт элем. Анткени, шаардан Сентоза аралына чейин аркан жолдор менен ошол аралыкта жайгашкан көк тиреген көп кабаттуу үйлөрдү аралап өтүп, чалкыган көк деңиздин, жашыл чытырман токойлордун үстүнөн өтүп бара жатып сөз менен жеткирүүгө мүмкүн болбогон сулуулукка  бийиктиктен ңазар саласыз. Мындай кооздукту айтып берүүгө сөздөн күчү жетпей калат экен. Ал нерсени барып көрүп, анан сезиш гана керек.

Сингапурдун туристтик белгиси болгон “балык сымал арстан” же “Мерлиондун” эң чоң айкели Сентозанын кире беришинде заңкайып турат. Сыртынан кадимки эле айкел болуп көрүнгөнү менен анын ичинде да бир канча чакан, уникалдуу, тематикалык музейлер оруналган. Мерлиондун эң чокусуна чыксаңыз бүт Сингапур шаары алакаңга салгандай болуп көрүнөт. Өзгөчө, кечинде бул жерден күндүзгүдөй жапжарык, түркүн түстүү жарыкка оролгон түнкү Сингапурдун кооздугуна, деңиз үстүнө чачылган жылдыздардын сулуулгуна суктанасыз. Сингапурдун жака белиндеги порттордо турган миңдеген кемелердин жарыгы түнкүсүн суу бетине жылдыздарды чачып салгандай көрүнөт.

Шаардын борборунан 500 м алыстыкта жайгашкан бул эс алуу аралынан дүйнөдөгү эң эле таң калычтуу, кызык, заманбап делген аттракциондун түрлөрүн табасыз. Дүйнөдөгү эң чоң океаниум дал ушул жерде жайгашкан. Океандагы керемет жашоону, андагы кызык, сейрек кездеше турган балыктарды суу түбүндө курулган айнек туннелдер аркылуу өз көзүңүз менен жанынан көрө аласыз. Туш тарабыңызда сиз балким ага чейин элестете албаган деңиз жаныбарлары ээн эркин сүзүп жүргөн болот. Анан да, кызыл дельфиндер менен чогуу сүзүү мүмкүнчүлүгүн дүйнө жүзү боюнча бир гана Сентозада бар.

Сентозада биринен бири өтүп таң калтырган уникалдуу тематикалык парктар арбын. Мисалы, “Көпөлөктөр паркы”, орхидеянын бүткүл жер бетинде кездешүүчү баардык түрлөрү бир жерге топтолгон ” Орхидея паркы”,  ар түрдүү  формадагы, көлөмдөгү, түстөгү кораллдар топтолгон музей,  өтө сейрек кездеше турган, үч уктасаңыз түшүңүзгө кирбей турган тири укмуш, ошол эле учурда кооз курт кумурскалар байырлаган “Кыбырактар музейи”…. Кыскасы айтып бүткүс кызыктардын дүйнөсү.

Сентозада бир канча кооз жээктер бар экен. Ошолордун биринде кечкисин “Убакыттын канаттары” аттуу лазердик шоу көрсөтүлүп турат. Сингапурда көргөн башка кызыктар бир тең, бул “Убакыттын канаттары” өзүнчө бир тең болду десем болот. Суу үстүндө, фонтан, салют, от, музыка жана ар кандай “спецэффекттердин” коштоосунда эски доорлорго барып, сырдуу жерлерди көрүп, дене боюңду дүркүрөткөн таасирлердин кучагына бөлөнөсүз.

Дарыялар дүйнөсү

Чынында эле Сингапур – жомоктогудай өлкө. Кадам сайын кайталангыс кызыктары менен таң калтырат. Дүйнөдө башка окшошу болбогон өтө оригиналдуу, өтө кызыктуу, ошол эле учурда өтө пайдалуу долбоорлордун ийгиликтүү ишке ашырылып, адамзат үчүн кызмат кылып жатканын көрөсүң. Мына ошолордун бири -“River Safari”. Бул жерде дүйнө жүзүндөгү ири, терең делген дарыялардын протатиби жасалып, ар биринде ошол дарыяны байырлаган балыктар жайгаштырылган. Кыска эле убакыттын ичинде дарыялар дүйнөсүнө саякат кылып, түркүн дарыяны мекендеген түркүн жандыктарды көрөсүз. Бул туристтик борбордогу укмуштардын ичинен “Амазон дарыясына” кайык менен саякат мени аябай таң калтырды. Кадимки эле токой аралаган дарыя, ачык асман, куштардын үнү… кайык менен бара жатып Амазон дарыясынын жээгин байырлаган кызыл тазыл, укмуштай сулуу куштарды, өмүрүңүздө кездештирбеген жырткыч жаныбарларды , маймылдарды, камандар тобундагы шумдуктарды өз көзүңүз менен көрөсүз. Болбосо Амазон каякта жатат…

 Өсүмдүктөр дүйнөсү

Өсүмдүктөрдүн эс тандырган кызык дүйнөсүн көрүүнү кааласаңыз шаардын ичинде жайгашкан Ботаникалык паркка баш багып көрүңүз. Андан ары кантип арбалып, кантип кирип, сансыз сандагы өсүмдүктөргө  кантип таң калып жүргөнүңүздү байкабай эле каласыз. Мен бак дарактардын эле миңдеген түрүн ушул жерден көрдүм. Ар бир материктен, ар бир өлкөдөн алынып келинген дарактар, бадалдар, жемиш бактары, жапайы өсүмдүктөр, гүлдөр, декоративдик жашылдыктар…Жер бетиндеги өсүмдүк атуунун баары ушул жерде окшойт деген ой келет. Баса, бул ботаникалык парктан биз кыргыз тоолорунун көркү болгон  жапжашыл арчаларды кездештирдик.

Биз жогоруда көргөн жерлерибиздин айрымдары тууралуу гана таасирлерибиз менен бөлүштүк. Мында тышкары да Сингапурда Singapore Flyer, Garden by the Bay, Jurong Bird park, City Gallery, China Town, Little India, Malay Village, Night Safari, National Museum of Singapore, Asian Civilisations Museum сыяктуу толгон токой кызыктуу туристтик жерлер бар. Аларды ар бири өзүңчө унутулгус көз ирмемдерди тартуулайт. Миң уккандан бир көргөн артык. Андыктан  Сингапурга камданыңыз, “Жомокко саякат” кылыңыз!

 

14 thoughts on “Жомокко саякат (2-бөлүм)

  1. Азаматсың! Калемиң курчуй берсин! Өркүнүң өссүн! Ушундай өкүл кызым болгонуна мен сыймыктанып жатам. Урматым менен өкүл апаң.

  2. Аябай жакшы жазылыптыр! Туристтик компаниялардын PR кампаниясында иштей турган экенсиң! Дагы да сапарларың улана берсин! Баскан жолуң байсалдуу болсун Досум!

Комментарий кошуу

Сиздин электрондук почтаңыз жарыяланбайт. Милдеттүү талаалар белгиленген *

*